Archive

Monthly Archives: September 2012

Unsa kahay birtud nga i-tuga
Ning tu’ ka rosas nga puwa?

Gawas sa kahumot nga maga-dan
subay sa mga eskinita sa
maka-saag mong galamhan.

Gawas sa kahumot nga magatangtang
sa salimbong sa atong mga kakuwang.

Buot ko unta nga ang rosas, imong palup-itan
Sa sidsid sa imong handurawan, aron makalimtan.
Kay way pulos ning gugmang gihambin
Kon sa akong kapit-os, ikaw ma-angin.

Apan sa kahinam, imong gihagkan
Ang balak sa buwak nga akong gitug-an.

Sa pag-dampi sa imong mainitong ngabil
Sa bulaknong garay, nangatukas ang mga tabil
Ug ang nag-uwang tang pagka-managlahi
Gitakgos sa alimyon, ang atong kalag, gi-tahi.

Ayaw handuma, nga sa alaut nga galamhan
ibanlas ka, bisan sa bul-og sa mga luha.

Kay ngadto sa atong limbahong kasadpan
Uban sa alimyon sa rosas, ikaw akong a-ubanan.

(RAC)
02142112
All Rights ReVersed

Advertisements

Usa ako ka pobreng mananangot,
awit, sanggot sa hawak nagkumbajot
Sonson sa tungog, pitlagong ug kawit
Sa ahong abaga nangumbabit.

Tan-awa ning sampot, ponggak na
Dala sa way puas nga palingkod sa palwa
Niay kuko’ng nagapanga-upak,
pirmi madokdok, maapil sa sinup-ak.

Baga na ning ahong dapi-dapi,
tinapwak sa punu-a’g lubi
Sa pagsapong sa matag sanggutan,
aron lang may mainom sa mga tuba-an.

Matag kawit nga dawat,
kwartang dili kinawat.
Manimaho man akong angot,
kini’y maoy hiso sa matinud-anong singot.

Bisan pag kining kamiseta mansta,
Makamao pud ko nga mahigugma
Bisag wa kahuma’g eskwela,
Ang kakugi naghandos nga magsige of saka.

Mao ra kini akong ikapakita,
kakugi nga sa uban, mahimong wala.
Karon, ako ania, ug mangutana,
palihug lang intawon, tubaga.

Tinuod bang balaod sa kalibutan
Nga ang manananggot sa gugma, adid-an?

Dugay ko nang gipanid-an si Inday Maricar
Nangita’g kog tiempo, nga ako makalugar
Ug didto sa likod-likod, ila Ingko Oscar
Nakalugar kog abay, kay sija gipapalit og asukar.

Ug didto, samtang ang baba, buot mokagar
ang gitan-ogang pagbati, Ni Maricar, giplastar.
Dungan sa pagpangatagak sa potot sa mga butay
Ug sa tam-is nga pahiyom, akong gugma gisaysay.

Apan, daw ang kasingkasing, giabisan
Dihang sa akong gisugid, imo kining giyam-iran
Diha-diha akong gibati ang agas sa duga sa pagkaligdong,
Hinay nga gipatulo, ug walay nagsawod nga sugong.

Sa luhang nagatulo, midagayday ang ahong kasubo
Lagbas sa ginit, pagdagayday sa duga nga sa tungog gipapait
Unta nia natay itagay, gugmang tim-os,
Tubang tam-is, bisan si Lagong andam maglumos,

Ang ahong hanjag, wa mo na gani dimdima ug tagamtama
Kay gitagay sa hungot nga hugaw, imo lang gi-etsa pwera
Inday Maricar, hangtud sa kinatumyang hakhak,
Hangtud ng ang ahong pitlagong maga pagakpak.

Mag-abis man ako sa bawog, o magbangan sa sawod
Ang kaanyag mo gayud, kanako magapabaskug.
Di jud ni maupod, bisan ako, sa hantud,
magsapong gihapon sa kinalajugang lindog.

Ug ning imong pagtub-os sa akong pagpaninguha
Pugson naho nga di masakit sa imong pagbalewa.
Anad na ming manananggot sa kasakit,
Kay sayud nga ang tungog, sa tuba maoy magapapait

Ang aho lang ika-ingon, anugon, wa ka maglantaw
Nga sa akong pagsapong sa lubing sanaw
Gawas sa hak-hak nga among giyatakan
Ug sa li-og sa butay-bawog nga gilunggo-an

Nabuhi kami nga pagpatu sa singot ug kusog
Samtang nagtambid sa hangas nga lindog.

September 3, 2012
11:22 PM